تيمور وشفيقة ومشاكل المحبين...ياريت كل الاعضاء يشاركو معانا!!!

كلنا عشنا او لسه بنعيش قصة حب وكلنا بتقابلتنا مشاكل كتير

دايما بنحتار فى حلها

وبنحتاج حد نستشيرة او نفضفض معاة

وده بقة التوبيك بتاعنــا

اننا هنختار مشكله

ونتناقش كلنا في حلها

او نحكي مواقف اتعرضنالها مشابهه للموقف ده

وده هيساعدنا كتير نحل مشاكلنا ونتعلم كتير

وده مش هيتم غير بمشاركة كل الاعضاء في التوبيك معايا

واول مشكله هنتناقش فيها

(التضحية في الحب)

الحب اساسه التضحيه

يعني لازم كل واحد يضحي عشان الثاني

او يعمل اي حاجة عشانه مهما كان التعب اللي هيواجهه

بس الى اى مدى ممكن اننا نضحى؟

هل اننا فى استعداد ان نخسر الحب لاى ظرف وندعى انها تضحيه

اما انه ستار نخفى خلفة السلبيه والخوف من تحمل المسؤلية

كلنا هنشارك ونقول راينا ومواقف اتعرضنالها مشابهه

بس ياريت تتفاعلوا اكتر مع التوبيك

وعايزة اراء جامده

ميرسى جدا يا مشرفتنا على الافكار الجامدة دى

ونا شايف ان مفيش حد حب مضحاش بحاجة

وعلى قد الحب على قد التضحية

واكمل بعدين لانى تعبان طحن

بس كان لازم طبعا ارد على التوبيك الرائع ده

بصي يا لولو
ان من وجهه نظري ان
بعض الاحبه
مهمها ضحوا محدش بيعترف بكل اللى ضحاه عشانه التانى
وبالذات البنات

ميرسي يا ميمو وسمسم

بس عايزين استفاضه اكتر في الردود

يعني سمعتو موقف او اتحطته فيه مشابه للموضوع

بليز يا جماعه عايزين تفاعل

اولا .. طبعا الموضوع حلو اوي يا لولو زي ما احنا متعودين منك

ثانيا .. التضحيه في الحب شيئ وارد بين كل حبيبين

وحاجه جميله فعلا اننا نضحي علشان خاطر حد بنحبه

اه هنضحي بحاجه ممكن نكون متاجنلها بس اللي هنضحي

علشانه هيكون طبعا اغلي عندنا من الحاجه دي

بس المهم اننا منضحيش بحاجه كبيره اوي يعني في حدود العقل

يعني مثلا انا شفت فعلا واحد باع اهلو وكل صحابه علشان خاطر واحده بيحبها

وده طبعا مينفعش ده اللي ملوش خير في اهلو ......

المشكله بقي ان البنت دي في الاخر سابته وراحت ارتبطت بواحد تاني غيره يعني كمان مكنش مختار صح

والاهم بقي ان هيه كان مرتبطه قبله كتييييير اوي اوي يعني مقضياها

وياريت فعلا تقولو ارأكم في موضوع التضحيه

وميرسي ليكي اوي اوي يا لولو

والله يا ساسو برافو

انتي فتحتي نفسي بردك ع التوبيك

ميرسي ليكي يا جميل

بجد فكره رائعه يا لولو
اما عن رائى فى التضحيه....
فالتضحيه فى الحب مهمه جدااا
واللى بحب بجد لازم يضحى
علشان الحب دة يستمر
انا ليه واحده صحبتى كانت بتحب شخص وهو كمان
وهى ضحت علشانه بحاجات كتير
لدرجه انها كانت مستعده تضحى بعمرها علشانه
بس لان الظروف كانت اقوى منهم وهى كانت بتقابل ضغوطات كتيير
هو كمان ضحى علشانها وبعد ةعنها علشان مش يسبب لها اى الم
شفتى تضحيه اكتر من كدة ضحى بحبه علشان راحه حبيبته

اكمل كلامى بقى

زى ما قولت انه على قد ان الشخص ما بيحب على قد ما بيضحى

يعنى انا اعرف واحد ضحى حاجات كتير عشان حبيبته

لدرجة انه تقريبا مبقاش ليه علاقه بحد علشانها

حتى بقرايبه

وضحى بحبه علشان شاف انه مش ملائم

بس بقى يا ترى هل هى قدرت التضحيات دى

مظنش لان تلت تربع بنات البلد دى دماغهم صغيرة

ميعرفوش يفرقوا بين اللى بيخاف عليهم وعلى مصلحتهم وبين اللى يقولك ونا مالى

هى اللى عايزه كده

وفى الاخر ميرسى اوى يا لولو يا افضل المشرفين على التوبيك المهم ده

وردة

ميرسي يا دوللي على رايك وردك

بس بالنسبه للموقف اللي قلتيه فمعلش دي مش اسمها تضحية

لان اللي بيحب حد مبيبعدش عنه لاي سبب بالعكس كان ممكن يعمل اي شئ

عشان يفضل معاها مش يسيبها ويعذبها اكتر

وميرسي ليك يا ميمو على ردك كمان

بس ليا تعليق البنات دماغهم مش صغيره ولا حاجة

البنت عقلها يفوق عقل الولد بخمس سنوات ودي حقيقة علمية مش كلام من عندي

lol!

بصى يا لولو

من خلال تجاربى فى الحياة بصراحة عمرى ما شوفت بنت عاقله

كلهم مجانين

( انا بتكلم عن تجاربى انا )

وسورى لو خرجت عن موضوع التوبيك

تيمور وشفيقة ومشاكل المحبين...ياريت كل الاعضاء يشاركو معانا!!! Hllo015cn1

بعد ما اتكلمنا عن (التضحيه في الحب)

بشكر طبعا كل اللي ردو على موضوع التضحيه وكل اللي قالوا رايهم

وطبعا زي ما التوبيك بيقول هنتكلم عن مشكله تانيه من مشكلات الحب اللي

كل المحبين بيتعرضولها ويمكن علاقتهم تتاثر بيها

والموضوع الثاني هيكون

(الفـراق في الــحـب)

مش كل قصة حب بتنتهي نهاية سعيدة

احيانا بتبقى نهايتها هي الفراق ..والفراق بيحصل لاسباب كتييييييير

او مشاكل معينه يبقى صعب كل حبيب وحبيبة يتغلبوا عليها او يعالجوها

وبيلاقوا ان الفراق هو الوسيله الوحيدة لحل المشكله

لكن السؤال؟؟

هل الفراق حل لاي مشكله؟؟

وايه هو السبب اللي يخلي اي حد يسيب حبيبه؟؟او حبيبته؟؟

ولو حصل هل هنفضل نفكر في حبيبنا القديم ؟؟ولا هنقدر ننسى ونكمل الحياه بشكل طبيعي؟؟

الباقي بقة عايزة اجمل اعضاء هما اللي يقولوه

هستنى ردودكم واي موقف حصل ليكو يتعلق بالفراق

وكمان عايزة اقتراحاتكم بخصوص المشكله اللي عايزين نتكلم عنها المرة الجايه

تيمور وشفيقة ومشاكل المحبين...ياريت كل الاعضاء يشاركو معانا!!! Tahiatje0

تيمور وشفيقة ومشاكل المحبين...ياريت كل الاعضاء يشاركو معانا!!! Tahiatje0

ازيك يا لولو طبعا بحييكي علي اخطيارك للمواضيع الجامده ده

الفراق ممكن يكون حل لبعض المشاكل

لكن لازم يكون الحل الاخير لانه الحل الاصعب اما بلنسبه للاسباب فحدثي ولا حرج واغلبها اسباب ماديه

وبصراحه انا مبفضلش التفكير في حاجه ممكن تتعبني وبعدين احنا مش

هنضحك علي بعض مفيش حد بيموت ورا حد والدنيا مبتقفش علي حد وكلها يومين والموضوع يتقلب ذكرا

موضوع مهم اوى يا لولو

الفراق فى الحب

وردك يا ميدو جامد جدا

وطبعا ممكن يحصل فراق بين اتنين بيحبوا بعض

سواء بمزاجهم او غصب عنهم

وفى الغالب بيبقى بالغصب لانهم مش هيسيبوا بعض بمزاجهم لو بيحبوا بعض

وفعلا فى الغالب بتبقى الظروف المادية هى السبب

ولو كان الفراق اكيد ولازم يحصل يبقى لازم الاتنين يحاولوا ينسوا بعض خالص

غصب عنهم عشان يعرفوا يعيشوا

وانا بقترح يا لولو بعد منشوف اراء الاعضاء فى المشكلة دى اننا نتكلم فى الغيرة فى الحب

وميرسى ليكى على الشغل الرائع

وردة

مع احترامى لكلام ميدو
بس انا من رائى ان الفراق عمره مكان حل لاى مشكله
بالعكس هو هروب من المشكله وسلبيه
او الحب من الاول مكنش حب حقيقى
لان اللى بيحب بجد بيتحدى الظروف
حتى لو كانت ماديه زى مابتقول
والفراق بيكون فى حاله واحده بس موت احد الطرفين
غير كده فبيكون هروب من المسؤليه او هروب من الحب

وبجد ميرسى اوى ليكى يالولو

ميرسي كتيييييييير ليكي يا لولو الموضوع بجد مهم جدااا

وللاسف انا مش معاكي يا دودي في ان الموت هو السبب الوحيد للفراق

في أسباب كتيره اوي خارجه عن ارادتنا ممكن تكون سبب في الفراق بين اتنين بيحبوا بعض

والحاله الماديه ممكن فعلا تكون سبب من الاسباب دي ...

وأكيد هيبقي صعب علي الاتنين انهم ينسوا بعض بس لاااازم

بس انا بقترح ان الموضوع اللي بعد كده يكون ( الاخلاص في الحب )

ميرسي ليكو

Memo

medo

دوللي

saso

بجد نورتو التوبيك بارائكم الجميله

بس ليا تعليق بسيط او ممكن تقولوا ان ده رايي

مينفعش يحصل فراق طالما اتنين بيحبوا بعض بجد لان مش كل يوم هنلاقي حد يحبنا

وزي ما بيقول عمنا وائل جسار

مش كل حب بينتهي هنحب بعده ولا اي حاجة حلوة بسهوله نلاقيها

يا جماعه مفيش حاجة اسمها ظروف ماديه لان الحال مش هيفضل واحد لازم هنسعى ولازم هنكون

نفسنا ولازم نعمل كل حاجة عشان حبنا يعيش وعشان ينتهي بالزواج والذريه لكن مينفعش نتواكل

ونقول عشانا عليك يارب لما اي مشكله تواجهنا

عارفه طبعا ان التكالييف جامده وان الشباب يا عيني غلابه بس زي ما المثل بيقول

تبات نار تصبح رماد

ولو كل واحد ساب حبيبته عشان ظروفه الماديه سوري يبقى ميستحقهاش ولا عمره حبها

وكده يبقى كان بيلعب بلعبه لما زهق منها رماها او لما لقى الموضوع دخل في الجد فك منها

وبعدين يعني هو كل شاب حب مفكرش في الظروف الماديه غير لحظة الجد ولا هي حجةهههههه

لازم نفكر بعقلنا وقلبنا ونقاوم ظروف الحياة القاسيه ونعمل اي شئ عشان اللي بنحبه

وطالما الحبيبه هتصبر عليك وواقفه جمبك ومش هتكون لغيرك يبقى الظلم حراااااااام

لان ساعتها لو سبتها يبقى بتظلمها لكن سيبها لو لقيتها مش مستحمله ظروفك وعايزة حد غني ومخلص

وبتمنى من ربنا ما يجيب فراق ابدا بين كل حبيب وحبيبته

ويارب اي حد دخل التوبيك وشافه وكان فارق حبيبته او حبيبه يرجعله ويعمل بكل ما فيه لانقاذ حبه

ميرسى جداً جداً يا لولو

على التوبيك الجميل ده

وعلى فكره أنا زعلت اوى إن مكنتش متابعه معاكم من الأول

هل الفراق حل لاي مشكله؟؟

أنا عن نفسى شايف إن الفراق عمره ما كان حل لأى مشكله

بل بالعكس هو سلبيه وعدم جديه فى الحب وهروووووووووووب من مواجهة المشكله

وايه هو السبب اللي يخلي اي حد يسيب حبيبه؟؟او حبيبته؟؟

السبب الوحيد هو عدم موافقة أهل أحد الطرفين او كلاهما

على هذا الإرتباط رفضاً لاجدال فيه

ولو حصل هل هنفضل نفكر في حبيبنا القديم ؟؟ولا هنقدر ننسى ونكمل الحياه بشكل طبيعي؟؟

من نعم ربنا علينا إنه خلق لنا نعمة النسيان

فعلاً الموضوع فى الأول هيبقى صعب جداً لكن مع مرور الوقت

كل اللى فات هيبقى ذكرى

ميرسي ليك جدا جدا يا
وردة

smsm

بجد احنا كنا هنخسر كتير لو معرفناش رايك الجميل والناضج جدا ده

وياريت تشارك معانا في كل مشكله نقترحها في الحب

لان بجد رايك يهمنا كلنا

بس ياريت تقولنا ايه المشكله اللي تقترحها عشان نناقشها المرة الجاية

مستنيين رايك اكيد

ياريت فعلاً يا لولو زى ماقال ميمو

نتكلم فى موضوع الغيره

تيمور وشفيقة ومشاكل المحبين...ياريت كل الاعضاء يشاركو معانا!!! Hllo015

بعد تأخير وغياب طويل عن توبيك تيمور وشفيقة ومشاكل المحبين

جتلكم بمشكلة كبيرة قوي من اكبر المشاكل اللي بيتعرضلها اتنين بيحبوا بعض وهي

الاهمـال بين المحبين

الموضوع ببساطة اني عايزة اعرف رأيكم في حبيب يهمل حبيبته ويحرمها من ابسط حقوقها

وهي انه يفضلها جزء من وقته ..وحتى لو كلمها تلاقيه مش معاها اصلا انشغل بشئ تاني
..
بمعنى ادق بيخليها اخر اهتماماته في الحياة

او العكس طبعا..ان الحبيبة هي اللي تهمل حبيبها ومتكلمهوش ولا تسأل فيه الا اذا احتاجتله

او اذا خلصت كل اللي وراها وخلاص بقه اخيرا افتكرته

وغير كده انواع كتيييير من الاهمال منتظراكم تذكروهالي

عايزة اعرف ايه رأيكوا في الموضوع ده؟؟

وايه تأثيره على اي اثنين بيحبوا بعض؟؟وتأثيره ع الحب نفسه؟؟

وتفتكروا الحبيب او الحبيبة اللي بتعاني من الاهمال تعمل ايه؟؟

وليه الاهمال ده اصلا؟هل هو ثقه زياده في حب الطرف التاني فخلاص بقه ههتم بيه ليه طالما بيحبني؟؟

السؤال الاهم:

هل ممكن يكون الطرف المهمل مبيحبش الطرف التاني اصلا؟؟

مستنيه ردودكم وارائكم اللي هتفيدنا كلنا وتفاعلكم اللي متعودة عليه

ولكم جزيل الشكر

وردة

ازيكم يا اعضاء هذا المنتدى الرائع

جميلة اوى يا لولو لو اتكلمنا عن الاهمال فى الحب

فعلا موضوع مهم

وفى ناس بتهمل حبيبها بس مش حاسة بكده

وفى ناس بتهمل عمدا

وده مبيحبش فى الاساس

وميرسى لولو على طرحك لها الموضوع

مستنيين رأى باقى الاعضاء الكرام

ميرسي ليك يا نور على ردك الجميل مع انه مختصر قوي

وحمد الله على السلامه في منتدى الحصريات مرة تانيه

ومنتظرين باقي الاراء

موضوع فى غايه الروعه يا لولو
وفعلا مهم اوى وكتير جدا الايام دى

عايزة اعرف ايه رأيكوا في الموضوع ده؟؟
موضوع مهم جدا جدا وربنا يستر منه
وايه تأثيره على اي اثنين بيحبوا بعض؟؟وتأثيره ع الحب نفسه؟؟

طبعا الاهمال فى الحب بيبعد المسافه بين المحبين ومن الممكن ان احد الطرفين ينشد لشخص تانى عنده الاهتمام والحنان
علشان كده لازم الطرفين يهتموا ببعض حتى لو بتليفون يحسوا انهم قريبين او على البال

وتفتكروا الحبيب او الحبيبة اللي بتعاني من الاهمال تعمل ايه؟؟

طبعا تعمل كل اللى فى وسعها علشان حبها ميضعش
بس طبعا لو الطرف التانى استمر فى الاهمال والا معناه يبقى لازم فتره يستعيدوا الذكريات يمكن ده يرجعهم تانى زى الاول

وليه الاهمال ده اصلا؟هل هو ثقه زياده في حب الطرف التاني فخلاص بقه ههتم بيه ليه طالما بيحبني؟؟

لاء طبعا يا لولو
انا مش معاكى فى كده لان اللى بيحب عمره مبيبقى قاصد انه يهمل حبيبه
لاكن اكيد فى ظروف هيا اللى بتسبب فى كده

السؤال الاهم:

هل ممكن يكون الطرف المهمل مبيحبش الطرف التاني اصلا؟؟

انا قولتلك قبل كده لو الطرف المهمل مبيحبش الطرف التانى يبقى فى الحال ده متعمد الاهمال
وده بيبقى واضح وياريت فى الحال ده تكون الصراحه موجوده

ميرسى اوى يا لولو على الموضوع الرائع جدا ده

وياريت تتقبلوا رائى

طبعا ميرسي ليكي يا يويو على ردك الجميل

بس مش دايما الاهمال بيبقى بسبب الظروف لكن في ناس بتستخسر في حبيبها الوقت

بيفضلوا يقضوا وقت افضل مع اصحابهم والسهر معاهم وممكن ميفكرش في دقايق او حتى ساعة يتكلم فيها مع حبيبته

اما لان صاحبه اهم..او لان حبيبته ممكن يكون دمها تقيل على قلبه..او مبقاش يحبها ويقدرها زي الاول

وبجد الاهمال ده بيموت الحب وبيخلي الطرفين يردوا لبعض مواقف وننسى بقى قصة الحب اللي جمعتنا اصلا

غير كده لما تلاقي واحد مهتم وواحد لا..دايما الطرف المهمل فيه بيبقى كرامته مجروحهلانه بيحس انه ساذج وعبيط

لما ادى اهتمامه وحبه كله لحد كان مفكر انه بيفضله على كل الناس وانه اول اهتماماته

وبعدين يكتشف انه كان مغفل وان لسه وحيد مالوش حد وانه مكنش المفروض يتعامل مع الناس بكل الصدق والطيبه

والاهتمام ده كله

ميرسى جداً يا لولو على الموضوع الجميل ده

أحب أوضح إن الإهمال بين المحبين ينقسم الى قسمين

إهمال المحبين المخطوبين ـــ إهمال المحبين المتزوجين

أولاً بالنسبه لإهمال المحبين المخطوبين أو اللى فى حكم المخطوبين

ده من وجهة نظرى بيبقى قليل جداً لا تتعدى نسبته 10%

لإن أغلب المحبين المخطوبين لا يريدون أن يترك أو يفترق إحداهما عن الأخر

دقيقه واحده فى الـ24 ساعه حتى ولو كان ده على حساب العمل او الدراسه

المهم إنهم جالسين وملازمين كل منهم للأخر

أما عن الإهمال فى فترة الخطوبه تقريباً بيبقى إهمال متعمد أو خصام متعمد

وبيبقى سببه كثره الخلافات بينهم لسبب وبدون سبب وفى هذه الحاله بيلجأ أحد الطرفين

لهذا الإهمال أو الخصام حتى يعاقب الطرف الأخر بهذا

وبعد يومين أو ثلاثه يأتى له مصالحاًً متشوقاً

ثانياً الإهمال بين المحبين المتزوجين

وده بيبقى كتير جداً ونسبته لا تقل عن 90 %

والأسباب كتير جداً وبتختلف من شخص لأخر ومنها

* الإطمئنان بالإمتلاك لهذا الشخص بالزواج

هذا الإحساس يدخل الفتور فى قلب صاحبه تجاه الطرف الأخر

* إنشغال الزوج وإعطاء كل وقته للعمل

* إنشغال الزوجه وإعطاء كل وقتها لأمور بيتها وأولادها

* كثرة الخلافات والشجار

وأخيراً أحب أقول لابد من عمل الزوج ولابد من عمل الزوجه فى بيتها

مع مراعاة كل منهم لحقوق وواجبات ومشاعر وأحاسيس الطرف الأخر

ولابد أن يتم الإتفاق على يوم فى الإسبوع أو كل 15 يوم أوحتى كل شهر

يتفرغ فيه الزوج والزوجه ليجددوا معاً حبهم وليستعيدوا شوقهم لبعضهم البعض

وميرسى يا لولو مره تانيه وأسف للإطاله

» الفراق بين المحبين
» **!!ZICO!!**الجبار معانا معقول ؟؟؟؟!!!!!
» قالوا عن الحب والرومانسيه!!لكن ماذا تقولوا انتم؟؟ياريت تقولولنا
» شارك معانا وابعت هدايا كل أسبوع لأمواتنا
» اتفضل ادخل معانا واحكى على احسن موقف اتحطيت فيه