شعللها شعللها ... ولعها ولعها !!!!!

السلام عليكم ورحمه الله وبركاته

اليكم الاتي ...

بعد إن قامت " ام ممدوح " بمسح كل بلاط الشقه تمسك بجردل المياه " اللي مش ولا بد "

ثم تتجه نحو البلاكونه وهيه تتحرك ببطء شديد بفعل وزنها الثقيل وقبل أن تصل الي سور البلكونه

وهيه تتنهج بشده ثم ترفع الجردل وتلقي بكل ما فيه من أعلي " تشششششششششششششششش "

بالضبط فوق رأس الاستاذ " عبد الحميد " الذي كان خارجا يرتدي بدلته الوحيده الانيقه النظيفه

متجها الى عمله ...

يصرخ عبد الحميد
يااارب .. استغفر الله العظيم .. ليه كده بس يا ست

أم ممدوح وهيه تدلى بنصف جسدها من خارج سور البلكونه وتكاد ان تسقط منه :
غصب عني والله يا أستاذ عبد الحميد مخدتش بالي

يظهر فجأه حسونه القهوجي الذي يدخل في الحوار لتهدئه النفوس :
مخدتيش بالك أزاي يعني .. مش تبصي قبل ماتحدفي الميه الغريبه دي ..
وبعدين أستاذ عبد الحميد يروح شغله أزاي دلوقتي ؟!!

عبد الحميد :
خلاص يا حسونه اطلع ألبس الجلابيه وأقولهم اني لسه جي من الحجاز حالا !

يتدخل حسنين البقال في الحوار برضه علشان يهدي النفوس :
جلابيه ايه يا أستاذ " عبد الحميد " ده حقك .. لازم " أم ممدوح " تجبلك بدله جديده
إن ماكنش ترفع عليها قضيه تعويض ورد شرف ... أمااال ... دي بدل ناس !!

يتطوع أستاذ " صابر " المحامي الذي كان سائرا بالمصادفه في الشارع
وأستمع الى الحوار ليدلي برأيه هو الاخر :

أيون تاخد تعويض وأنا مستعد أجبلك حقك في 7 سنين بس
ولو رفضت تدفع ندخلها الاحداث .. دي جنايه .. دي شبهه .. جريمه قتل

أفرض الميه كان فيها حشرات ضاره ولا بكتيريا " يرسينيابيستيس "
اللي بتجيب الجمره الخبيثه .. تموت كده في جردل !!

يخرج د " بركات " بالبالطو الابيض من صيدليته العتيقه ذات الابواب الخشبيه المهكعه
وهو يقول في هدوء :
الكلام ده مظبوط انا لسه واحد واخد مني الدواء بتاع انفلونزا الطيور
لان واحده جارته رمت عليه برضو شوربه فراخ !

أتفضل يا أستاذ عبد الحميد اكشف عليك ولو ثبت إن عندك الجمره الخبيثه
أكتبلك ورقه موثقه بكده علشان تنفعك في القضيه
بس متنساش لما تاخد فلوس التعويض بقى .. هاهاهاها أتفضل أتفضل !!

وزي ما أنتو شايفين كده الناس اللي بتحب الخير كتير أوي !!
من أول حسونه القهوجي لغايه د " بركات " الصيدلي ..
وعد إنت مابينهم وما بعدهم !!!

هتكتشف إن كتيييير من المصريين أصبح يرفع شعار " شعللها شعللها .. ولعها ولعها "
وهيه أغنيه غناها مطرب شعبي في التسعينات وكأنه كان بيوصف حال ناس وطنه ..

أغلب الناس مبقتش زي زمان تقرب النفوس من بعض وتطيب الخواطر وتلم المواضيع ..
لأ بيدوروا علي البنزين بيتباع فين ولو بالتمن الغالي ويحطوه فوق النار

الغريب إن شعللها ولعها مش موجوده بس في تفاصيل الحياه اليوميه ..
في الشارع " الخناقات اللي بتحصل فيه كل يوم " وفي البيت " الخلافات بين اراد الاسره الواحده "
وفي الشغل " الزنب المقالب اللي الناس بتعملها في بعض علشان ده يطلع فوق ده "
والمدرسه والجامعه " الواد ده بيعاكس البنت بتاعنك متسبهوش لاااازم تقطعه " !!!

ده الموضوع وصل لما هو أخطر
- رغم إن اللي فات كان خطير طبعا -
وصل لموضوع الاديان !

يعني مثلا لو شفت أي أخبار في الفتره اللي فاتت دي هتلاقي عناوين ساخنه جدا :

" جماعات لتنصير المسلمين "
" 4 شباب مسلمين يختطفون مسيحيه "
" صراع المصحف والانجيل في القاهره "

-حاجااااااااااااااات تخض -

هو صحيح مش لازم نخبي نفسنا في الرمل ونعمل "هييييييييه " مفيش حاجه !!!

بس الاكيد والمؤكد إن أسلوب شعللها ولعها مش طريقه لحل أي مشكله

بل بالفعل يزيد الطين بله

والسؤال هنا ......

من الخناقات في البيةت والشوارع لغايه المشكلات الطائفيه
إيه اللي أتغير في سلوك المصريين ؟؟؟

وليه أصبحوا متربصين لبعض ..
كل واحد متحفز على التاني ومستنيله علي الواحده ؟؟؟..

وليه أصبحوا ميالين لإشعال الامور وتوليعها
ومش بيسعوا الى التهدئه والمصالحه
- مع الحفاظ على الحقوق والكرامه طبعا -

وتفتكروا أزاي نرجع لصفاتنا الاصليه الطيبه ؟

وأزاي نبطل نشغل أغنيه
" شعللها شعللها .. ولعها ولعها "

والسلام ختام ...

أرجو الرد

والله عندك حق في كل كلمة قلتيها معظم الناس بقة بيجري في دمها الشر

وعايزين دم عايزين الناس تتلم....واحيانا لو في خنلقه تلاقي ناس بتضحك

ميرسي ليكي يا ساسو بجد توبيك مميز جدا وجميل

ميرسي لردك أنتي يا لولو

كلامك صح وبيحصل فعلا

بس زمان عمر ما كان يجرؤ حد أنه يعمله

كلامك كله صح هو ده اللى بيحصل دلوقت
كل الناس دلوقتى كل اللى يهمها انها تتفرج على خناقه و على راى لولو عايزين دم عايزين الناس تتلم
مش زى زمان كل الناس كانت بتحب بعض و تدور على راحه غيرها
بس بجد توبيك جامد وميرسى ليكى يا ساسو

ميرسي لرأيك انتي يا قمر

بس ياتري أيه اللي خلانا نبقي كده ؟؟

وياتري بقوا هما دول المصريين دلوقتي ؟؟؟

نورتي التوبيك بردك يا إسراء

ميرسى ليكى يا جميل
بس انا اعتقد فى اللى خلانا كده
المشكلات الكتير اللى فى بلدنا و التدهور اللى احنا فيه
زى غلو الاسعار و حاجات تانيه كتير
و ده طبعا خلى كل واحد مش بيهمه غير نفسه
مش زى زمان كل واحد قلبه على التانى
و هما المصريين دلوقتى اغلبهم كده
ومش كلهم

توبيك فى غاية الجمال والروعه يا سا سو

بس للأسف ده بقى حال المصريين فى مصر وبره مصر

وعلشان أكون صريح معاكى وعلشان إنت متتعبيش من التفكير

ده سببه حاجه واحده بس وهى

ضعف الإيمان فى النفوس والبعد عن سنة نبينا محمد عليه أفضل الصلاة والسلام

صح يا سمسم عندك حق

احنا لو مشينا على سنه النبى صلى الله عليه وسلم

اكيد هنبقى احسن من كده كتيييير

ميرسي جدا لردك

نورت التوبيك